46.4 Grad in Melbourne!

Am 7.Februar 09 hets gheisse, es wird um die 40 Grad! Also hei mr dänkt, mr gönge zum Strand go bade! Denn aber plötzlich isch so en heisse Wind cho...!!

Mr hei beschlosse hei zgoh und sind zur Tram Station gloffe! Dr Wind isch denn so stark und heiss gsi, dass es eifach nur weh gmacht het uf dr Hut! Mr hei dTüecher müsse före neh und uns verdecke! Zum Glück hets en grosse Baum gha bi dr Haltestell wo mr ca. 10 Minute hei müsse warte! Tüecher hei mr fors ganze Gsicht ghebt und es het uns fasch welle furt blose!!

dFüess in de Flip Flop hei mr ned chöne decke und mr hei gmeint, sie wärde verbrennt!

Zum Glück isch denn sTram cho und hei denn 20 Minute döt inne no witerbrötlet! dKlimalage sind usgfalle... =/

Denn hei mr no ca. 10 Minute zur Seraina hei müsse laufe... Zum Glück hets döt im Wohngebiet nüm so gwindet und es isch gange mit dr Hitz!

Bi ihre dähei simmr grad ins Pool ghüpft! Leider isch döt dReinigung usgfalle und sWasser isch in kurzer Zitt grüen gsi. Aber mr hei so heiss gha und sind glich drih... jedoch nach 5 Minute isches zu warm gsi und mr sind ins kühle Hus go kalt dusche und dr Rescht vom Tag dinne gsi!

Jo, das isch es Erläbnis gsi! Die Lüt wo doh wohne hei das au no nieh erläbt! Es hets gar no nieh geh, sid sie in Melbourne dTemperature ufschribe! Es isch för alli en Usnahmezuestand gsi!!

46.4 Grad!!! Isch intresant gsi, das mou zerläbe aber het ächt glängt =/

Leider hets denn au an däm Tag sBuschfür no witer verbreitet und die vo letscht Wuche sind au widr cho! Es het an däm Tag 14 Toti geh und öber 100 Fam. hei ihres Dähei verlore!

dFührwehr isch laufend im Isatz und git ihres Beschte.. hoffe mr, es isch gli verbi!!

Hüt am 8.Feb. 09 hets nur no 24 Grad und sogar bitz Räge geh! Öber dNacht hets vo 46 Grad uf 24 Grad abekühlt... eifach wahnsinnig wie rasch das Wätter do wächslet mit däm Wind!!

dLüt doh hei gmeint, mir wärde die Temperature vo letscht Wuche vo 43.4 Grad nieh mehr erläbe.. aber ezt hei si en neue Rekord: 46.4 Grad! Es isch niehne in Australie so heiss gsi wie bi uns in Victoria! Mir wo doch am südlichste Ort sind.... Unglaublich!!!

NEWS: 09.02.2009

Ich mues no Agabe vo obe korrigiere! Lut neue Agabe vo Australie sind ezt 128 Persone im Führ ums Läbe cho. Drei Staate sind betroffe, unter anderem Victoria wo Melbourne dHauptstadt isch! 3000 Quadratkilometer sind verbrennt!

För uns in Melbourne bestoht aber kei Gfohr!